Лидерот на ВМРО-ДПМНЕ, Христијан Мицкоски денеска одговараше на новинарско прашање дали и кога ќе се качи со воз за да ја посети Битола. Како што истакна, тоа ќе се случи после промената на раководството на ЈП „Македонски железници“ и враќање на возниот ред.
-Се надевам дека како иден премиер заедно ќе ве поканам да патуваме од Скопје до Битола, му одговори Мицкоски на новинарот при посетата на општина Битола.
Претседателот на ВМРО-ДПМНЕ беше запрашан и кој ќе биде носител во петтата изборна единица од неговата коалиција, откако тој претходно изјави дека ќе биде кандидат во првата.
-Се уште не сме ги определиле носители официјално иако јас самиот себе се претставив како потенцијален носител во изборната единица 1. Набрзо од денеска јавноста ќе ги знае носителите во останатите изборни единици. Исто така се подготвуваме за конвенцијата за избор на претседателски кандидат позади кој што ќе застане ВМРО-ДПМНЕ и коалицијата, рече Мицкоски.