Иако граѓаните вчера се кренаа на нозе по пријавата за исчезнатата девојка Симона Стојкова, ситуацијата целосно се искомпликува откако лично девојката се огласи синоќа на социјалните мрежи и објави дека објавата за нејзино исчезнување е лажна.
-Драги пријатели,сите што ме познавате лично и оние што не ме познавате, објавата денес што се прошири дека сум исчезната е ЛАЖНА !!! Се кренала лажна тревога!!! Благодарам за трудот и загриженоста да ме најдете но се работи навистина за лажна тревога! Поздрав! Симона, стои во објавата на социјалните мрежи на профилот на девојката.
Вест за исчезнатата, со нејзина фотографија и апел до јавноста за информации, масовно се споделуваше на социјалните мрежи. Симона Стојкова, 35 години, се јавила со врисоци од туѓ телефонски број вчера, откако е исчезната – пишува на страницата за рано предупредување за исчезнати деца „Најди ме“. Таму се уште стојат податоците дека е исчезнато лице.
-Последен пат е слушната токму на денот на исчезнувањето, кога се јавила по телефон со врисоци од бројот 076 851 228, по што повеќе не е достапна. Симона има кафена коса, кафени очи, висока е околу 175 сантиметри, и носи очила, пишува во описот на „Најдиме.орг.мк“.
Од Министерството за внатрешни работи кратко информирале дека кај нив не е пријавено исчезнување на девојката од Скопје.
„Најди ме – Систем за рано предупредување за исчезнати деца“ е воспоставен од Новинари за човекови права како дел од „Пилот -проектот за систем за рано предупредување за исчезнатите деца“ во Македонија во соработка и под проектен менаџмент на ЕКПАТ Австрија, а со финансиска поддршка на Федералното министерство за социјални работи, здравство, грижа и заштита на потрошувачите на Република Австрија.