Претставници на семејствата на жртвите од трагедијата во Модуларната болница во Тетово одржаа прес-конференција пред Основниот суд во Тетово, на која изразија поддршка за јавното писмо од Иницијативата Нула упатено до државниот јавен обвинител Љупчо Коцевски.
Според нив, постојат сериозни докази кои, како што тврдат, Обвинителството ги има отфрлено во досегашната постапка пред судот.
„Целата јавност знае дека постојат сериозни докази за пропусти при изградбата на модуларната болница, кои можат да бидат единствени причини за пожарот. Тоа беше потврдено и со германското вештачење – независен и кредибилен доказ кој за жал беше отфрлен од обвинителството“, изјави Агрон Арифи, претставник на Иницијативата, обраќајќи се до Коцевски.
Тој нагласи дека ова не е само правно прашање, туку и морална обврска кон жртвите и кон сите граѓани кои живеат со страв дека таква трагедија може повторно да се случи, а никој да не одговара.
Семејствата на 14-те жртви побараа Обвинителството да ја обнови истрагата за вистинските виновници за пожарот.
„Време е некој да преземе одговорност. Време е правдата да излезе од фиока. Бараме од Вас да формирате независен тим кој ќе ги испита сите аспекти на случајот, вклучително и евентуалното одолговлекување на постапката. Да гарантирате дека судската постапка ќе се води без политичко-бизнис влијание. Да обезбедите транспарентност и отчетност во Вашата работа, во согласност со законските обврски. Да го земете германското вештачење како клучен доказ во истрагата. Ние нема да молчиме. Ќе продолжиме да зборуваме за нашите најблиски кои ги изгубивме, за вистината, за правдата која е ветена, но никогаш донесена“, нагласи Арифи.
Од 10 часот денеска во Основен суд Тетово продолжи доказната постапка во рамките на повторното судење за пожарот во модуларната болница, во кое осомничени се двајцата поранешни директори на болницата и Јавната здравствена установа Клиничка болница Тетово како правно лице.