Моќната сестра на севернокорејскиот лидер Ким Јонг-ун, Ким Јо-Јонг, им порача на САД да се подготват за самоодбрана додека Северна Кореја ја зголемува моќта на своето нуклеарно оружје. Нејзиното предупредување доаѓа по истрелувањето на нови севернокорејски ракети, што дополнително ги зголеми тензиите во азиско-пацифичкиот регион.
Јапонската крајбрежна стража во понеделникот наутро потврди дека Северна Кореја истрелала уште три балистички ракети кон јапонските води. Новата провокација дојде откако севернокорејската војска викендов ја лансираше својата интерконтинентална балистичка ракета (ICBM) Hwasong-15.
Поради новото тестирање на Северна Кореја, САД ги кренаа своите суперсонични бомбардери со долг дострел, кои летаа заедно со јужнокорејски и јапонски воени авиони како демонстрација на сила.
Сестрата на севернокорејскиот лидер и заменик директор на Централниот комитет на Работничката партија на Кореја, го предупреди Вашингтон дека Пјонгјанг ќе реагира на секоја „директна или индиректна закана“, пренесува „Телеграф“.
„Фреквенцијата на користење на Пацификот како полигон за тестирање зависи од акцијата на американските сили“, гласи изјавата на влијателната личност за која некои веруваат дека е можен наследник на нејзиниот постар брат, иако неодамна Ким Јонг-ун беше исклучително впечатлив во јавното претставување на својата ќерка за која се верува дека има околу 10 години.
„Уште еднаш потврдуваме дека нема промена во нашата волја да ги натераме најлошите манијаци кои ги зголемуваат тензиите да ја платат цената за своите постапки“, додаде таа.
Негирајќи ги извештаите дека боевата глава на ICBM не го поминала тестот, таа ги нарече нуклеарните експерти „глупави“ и повтори дека оружјето претставува закана за САД. Теоретски, севернокорејскиот ICMB би можел дури и да стигне до Северна Америка.
„Таков аргумент, изнесен од почетници на кои им недостига гореспоменатиот здрав разум и се преправаат дека се експерти, нема да ја промени ситуацијата на кризата со која се соочуваат САД и Јужна Кореја“, рече Ким Јо-Јонг.
„Имаме задоволителна технологија и способности и сега ќе се фокусираме на зголемување на количината на таа моќ… Подобро би било да размислуваат како да преземат мерки за да се одбранат, наместо да се сомневаат или да се грижат за туѓата технологија“, додаде таа.
Лансирањето на ракетата во понеделник е трет голем тест на оружје во светот на најзатворената земја оваа година. Минатата година, Пјонгјанг лансираше проектили во повеќе од 30 одделни прилики, вклучително и тест во март кога го изврши она што се верува дека е најголемиот ICBM тест досега со оружјето кое лета на надморска височина од повеќе од 6.000 километри и патуваше на растојание од околу 1.100 километри пред падот во ексклузивната економска зона на Јапонија (ЕЕЗ).
Севернокорејската државна новинска агенција објави дека ракетата Хвасонг-15 прелетала дури 5.768 километри во саботата пред точно да погоди однапред одредена област оддалечена 989 километри во отворени води.
„Ако Северна Кореја го изврши седмиот нуклеарен тест, што може да се случи во секое време, тоа ќе ја промени играта во однос на тоа дека Северна Кореја ќе може да развива и распоредува тактички нуклеарни проектили“, рече јужнокорејската министерка за надворешни работи Парк Џин на Минхенската конференција за безбедност во сабота.