Со почетокот на имплементацијата на бас-рапид транзитот, во центарот на градот ќе биде дозволено движењето само на на противпожарните и амбулантските возила. Останатиот вид на сообраќај ќе мора да се дисперзира по средниот сообраќаен ринг, рече денеска скопскиот градоначалник Петре Шилегов објаснувајќи дека „Мал Ринг“ во центарот на Скопје треба да биде затворен за сообраќај до крајот на 2023 и главниот град да ја има најголемата пешачка зона во Европа.
–Од тука, гледано веќе сме некаде при крај, а мораме да одиме паралелно со тие димензии, затоа што мораме да дадеме и алтернативен начин на граѓаните за движење низ центарот, па да го затвориме автомобилскиот сообраќај и тоа како стратешка цел на нашиот град ќе се имплементира заедно со првата фаза од бас-рапид транзитот. Јас очекувам дека е многу можно до крајот на 2023 година сведочиме на такво нешто во нашиот град со што Скопје ќе го направиме можеби град со најголема пешачка зона во Европа, од стара Железничка до Бит Пазар, од Собрание до „Ловец“, рече Шилегов.