Градоначалникот на Град Скопје Петре Шилегов денес изјави дека една од причините за продажба на Градската куќа е несоодветна, односно „несреќно избрана локација“, по што истакна дека една од идеалните локации за овој објект би била на местото на „Мериот’, но и дека не знае кој ќе се пријави на јавната аукција, а не ја посочи ни точната локација каде би била сместена градската администрација.
„Ми се допаѓа идејата дека Градската куќа треба да биде во централното градско подрачје, на самиот плоштад бидејќи тоа е стандард што постои секаде во Европа, секаде во светот. Ако беше таа локација толку атрактивна како што се обидуваат од опозицијата да прикажат изминативе неколку дена, зошто тогаш не го подучија Сашо Мијалков да го направи таму хотелот, а на местото на Мериот да ја имавме Градската куќа. Криво ми е што неколкуте локации што беа слободни на плоштадот не беа искористени за да се направи навистина добар, репрезентативен објект за нашиот град, како што е секаде во светот“, рече Шилегов.
Според него, опозицијата во недостаток на аргументи пласира еднострани информации во јавноста, како и дека е спремен да излезе на дебата со опозицијата.
„Ако имаа било какви аргументи зошто ја напуштија седницата на Советот на Град Скопје? Таму требаше да ги соочиме аргументите – за или против продажбата. Вака сега ќе свикуваме прес-конференции, ќе кажуваме лаги, ќе претпоставуваме хипотетички ситуации затоа што нема кој да ви одговори. Кога сакаат, каде сакаат, на било кој медиум, во било кое време, било кој претставник на опозицијата, јас сум подготвен да се соочиме“. додаде градоначалникот на Скопје.