Руска делегација предводена од министерот за одбрана Сергеј Шојгу пристигна во Северна Кореја, придружувајќи се на кинеската група и беше меѓу првите кои ја посетија таа земја од почетокот на пандемијата.
Делегациите утре ќе ја прослават 70-годишнината од Денот на победата во Пјонгјанг, објави државната новинска агенција KCNA, а членот на политбирото на Комунистичката партија на Кина Ли Хонгџонг ја предводи групата од неговата земја. Во главниот град на Северна Кореја се очекува голема воена парада.
„Официјалната церемонија на пречек на руската делегација се одржа на меѓународниот аеродром Сунан со учество на чета на почесната гарда на Корејската народна армија“, се вели во соопштението на руското министерство за одбрана.
Russia’s Defense Minister Shoigu has arrived in North Korea. pic.twitter.com/Q8XJPQii1D
— Jack Straw (@JackStr42679640) July 26, 2023
Северна Кореја ја затвори својата граница на почетокот на 2020 година за сите трговски и дипломатски размени, дури и со главните економски и политички партнери Кина и Русија. Државните медиуми не кажаа дали посетите на официјални лица од тие земји ќе означат некаква промена во политиката.
Кина во понеделникот објави дека „строго“ ги спроведува санкциите на ОН за Северна Кореја, реагирајќи на писмото од групата Г7, Европската унија и други кои го повикаа Пекинг да го спречи Пјонгјанг да ги заобиколи санкциите користејќи ги кинеските води.
Соединетите Американски Држави ја обвинија Северна Кореја дека ѝ дава воена помош на Русија за нејзината војна во Украина, што и Пјонгјанг и Москва го негираат.