Нуклеарната агенција на ЕУ, „Евроатом“, во вторникот соопшти дека не гледа непосредна опасност за производството на нуклеарна енергија во Европа доколку Нигер ги прекине испораките на ураниум.
„Евроатом“ за Ројтерс изјави дека Нигер, каде воената хунта ја презеде власта минатата недела, беше вториот најголем снабдувач на природен ураниум на Европската унија минатата година.
Се додава дека компаниите во Европската унија имаат доволно залихи на ураниум за гориво за нивните нуклеарни реактори три години.
„Ако се намали увозот од Нигер, нема непосредни ризици за безбедноста на производството на нуклеарна енергија на краток рок“, посочува „Евроатом“.
Франција, водечки европски производител на нуклеарна енергија и поранешен колонијален господар на Нигер, во вторникот објави дека ќе ги евакуира француските и европските граѓани по соборувањето на демократски избраната влада во земјата.
Европската комисија, исто така, објави дека Унијата има „доволно залихи на ураниум за да ги ублажи сите краткорочни ризици за снабдување“.
„На среден и долг рок, има доволно депозити на светскиот пазар“ за покривање на потребите на ЕУ, изјави портпаролот на Комисијата.
„Евроатом“ вели дека во 2022 година, Нигер испорачал 2975 tU природен ураниум, или 25,4 отсто од залихите на ЕУ.
Казахстан беше најголемиот снабдувач на ураниум, а Канада трет.
„Евроатом“ забележува дека блокот би можел да го диверзифицира увозот во рок од три години, вклучително и од моментално неактивен производствени капацитети во Канада, Австралија и Намибија, како и од новите депозити.
Европската унија ја прекина финансиската поддршка и безбедносната соработка со Нигер по воениот удар.