КОЛКУ пати сте слушнале дека појадокот е најважниот оброк во денот? Постојат многу докази кои укажуваат токму на тоа, особено кога се во прашање децата. Имено, бројни истражувања покажале дека појадокот го подобрува однесувањето на децата на училиште, а лошите навики на исхрана може да го загрозат нивниот раст и развој, пренесe The Conversation. Следствено, можеме со сигурност да потврдиме дека квалитетниот појадок им помага на децата да им се обезбеди енергијата што им е потребна за претстојниот ден и хранливи материи што им се потребни за раст и развој.
На краток рок, појадокот може да ја зголеми енергијата и мотивацијата за учење. Брзиот метаболизам и раст на децата значат дека им е потребна оптимална исхрана. Тие имаат поголеми барања за складирање на гликоген (или енергија) во текот на ноќта додека спијат, а бидејќи обично спијат подолго од возрасните, тие остануваат без храна подолго време. Затоа, хранливиот појадок е особено важен за да се обезбеди „гориво“ за оксидација на гликозата.
Кога нивото на гликоза во крвта е ниско, се ослободуваат хормони како адреналин и кортизол, што може да предизвика децата да се чувствуваат возбудено и раздразливо. Ова исто така може да влијае на нивната концентрација, па дури и да предизвика агресивно однесување. Децата кои не појадуваат наутро почесто се борат со недостаток на енергија и многу потешко се справуваат со училишните задачи, тврдат експертите.
Исто така, квалитетниот појадок може да доведе до подобри училишни перформанси, на пример оценки. Од друга страна, децата кои редовно го прескокнуваат појадокот имаат поголема веројатност да имаат проблеми со решавањето на тестовите или да го прескокнат училиштето.
Исто така, постои врска помеѓу појадокот и менталното здравје. Вообичаената храна за појадок, како што се млекото и храната од цели зрна се одличен извор на хранливи материи кои влијаат на функцијата на мозокот. Истражувањата покажаа дека појадокот со различни групи на храна кои го зголемуваат внесот на витамини и минерали може да доведе до подобро ментално здравје кај адолесцентите, додека оние кои ги прескокнуваат, сите овие придобивки ги нема.
Децата кои го прескокнуваат појадокот, исто така, имаат поголема веројатност да имаат потреба од нездрави закуски во текот на денот. Ужините можат да обезбедат до една четвртина од дневниот внес на енергија кај некои адолесцентни популации, а бидејќи грицките често вклучуваат нездрава храна поврзана со развојот на прекумерна тежина и дебелина, едукацијата на децата за добра рутина за појадок е клучна.