Односите со режимот на Путин и Русија не можат да бидат како и обично, а Европската Унија испрати кристално јасна порака до Србија, изјави портпаролот на Европската комисија за European Western Balkans (EWB) кога беше прашан за средбата меѓу српскиот претседател Александар Вучиќ и рускиот претседател Владимир Путин и посетата на претседателот на парадата во Пекинг, пишува EWB.
„Србија мора да нè убеди во својата стратешка ориентација кон ЕУ и да демонстрира веродостојна посветеност на европските вредности“, се наведува во писмениот одговор на EWB.
Се потсетува дека Србија аплицирала за членство во ЕУ и преговара за тоа, и дека таквата одлука на Србија подразбира дека земјата се хармонизира со ЕУ, вклучително и во областа на надворешната политика.
Како што оценија, Кина е клучниот двигател на руската агресија против Украина и дека без Кина, Русија не би можела да продолжи да ја води оваа војна во иста мера.
Српскиот претседател Александар Вучиќ за време на средбата со рускиот претседател Владимир Путин изјави дека соработката на највисоко ниво со Москва во сите области е многу важна за Белград.
На почетокот на средбата со Путин, Вучиќ истакна дека Србија не вовела никакви санкции кон Руската Федерација и дека ќе продолжи да ја одржува својата неутралност.
„Би сакал да ве информирам дека Србија е во тешка ситуација и под голем притисок од почетокот на украинската криза. И покрај ова, успеавме да ја одржиме нашата принципиелна позиција и да ја одбраниме независноста на Србија“, нагласи Вучиќ.
Вучиќ беше во Пекинг оваа недела за да ја одбележи 80-годишнината од крајот на Втората светска војна. На воената парада подготвена за таа пригода, меѓу гостите на кинескиот претседател Си Џинпинг беа севернокорејскиот лидер Ким Џонг Ун и повеќе од 24 други шефови на држави и влади.