Кина и ЕУ треба да работат заедно за да се спротивстават на едностраното малтретирање на Америка за да ги заштитат не само нивните интереси, туку и меѓународните правила, кажа кинескиот претседател Си Џинпинг, како одговор на царините и давачките наметнати од американскиот претседател Доналд Трамп.
Тој посочи дека во трговската војна нема победници.
„Кина и ЕУ треба да ги почитуваат своите меѓународни обврски, заеднички да го бранат трендот на економска глобализација и да ја зачуваат меѓународната трговија“, рече Си за време на состанокот со шпанскиот премиер Педро Санчез во Пекинг.
Според него, одењето против целиот свет значи самоизолација.
Да потсетиме, американскиот претседател Доналд Трамп рече дека САД веднаш ќе ги зголемат царините за кинеските стоки и производи на 125%, додека ги паузираат царините за другите земји на 90 дена.
Кинескиот претседател нагласи и дека Пекинг, без оглед на промените во надворешното опкружување, ќе остане самоуверен, решителен и фокусиран на сопствените работи.
Тој исто така информира дека Кина е подготвена да изгради стратешко партнерство со Шпанија, додавајќи дека стабилните и здрави односи меѓу двете земји добиваат сè поголемо значење како што меѓународната ситуација станува посложена.
Кинескиот претседател и шпанскиот премиер разговарале и за украинската криза, објави кинеската државна телевизија.