Снимки од безбедносни камери на црногорските гранични премини што ги користел Никола Груевски при бегањето ќе бара Обвинителството

Снимки од безбедносни камери на црногорските гранични премини што ги користел Никола Груевски при бегањето ќе бара Обвинителството. Тоа го изјави јавната обвинителка за организиран криминал и корупција Вилма Рускоска, откако денеска и официјално го презеде раководењето со тој оддел.

Во изјава за Телма таа рече дека Обвинителството издало наредби до полицијата интензивно да работи на откривање на луѓе кои помогнале при бегството на поранешниот премиер како и наредби за проверка на телефонски повици и безбедносни камери.
МВР вели дека собраните информации се предадени на Обвинителството, а во нив спаѓаат и разговори извршени со полицајци на граница и во други служби.