Новиот сопственик на Челси, Тод Боли пристигна лично во Барселона за да преговара со раководството на Каталонците за неколкуте трансфери кои двата клуба се обидуваат да ги договорат меѓу себе.
Веќе вчера шпанските медиуми открија дека лондончани се вклучиле во битката за играчот за врска Френки де Јонг, кој е главна трансфер цел на Манчестер Јунајтед. Ова се случи при последните преговори на двата клуба за бековите Маркос Алонсо и Цезар Аспиликуета, кои се многу посакувани од тренерот на Каталонците, Чави Ернандез.
Се зборува дека шефот од „Стемфорд Бриџ“ им ги понудил двајцата дотични играчи плус 60 милиони евра за холандскиот играч за врска.
Покрај тоа, „сините од Лондон“ покажуваат интерес за уште двајца играчи на Барселона – Мемфис Депај и Сержињо Дест.
Боли беше снимен како влегува во ресторан во Барселона, на кој присуствуваа и претседателот на „блауграна“, Жоан Лапорта, Жорди Кројф и Матео Алеманиа. Запрашан зошто е во Барселона, Боли одговори: „Тука сум на вечера“.
На излегување тој беше исто толку скротен, велејќи дека вечерата е одлична, а храната неверојатна.
Вчера уште еднаш Лапорта изјави дека клубот не сака да го продаде Де Јонг. И самиот играч најави дека не сака да си замине. Сепак, Каталонците имаат сериозни проблеми со платата на Холанѓанецот, која значително се зголемува од следната сезона. Поради ова, шпанските медиуми веруваат дека Барселона сепак ќе се обиде да го продаде играчот од средниот ред.
Барселона ова лето веќе ангажираше еден поранешен играч на Челси – Андреас Кристенсен, кој пристигна на Камп Ноу како слободен играч и официјално беше претставен вчера.