По силниот земјотрес во западна Јапонија загинаа најмалку 62 лица, а се верува дека десетици се заробени под урнати згради.
Префектурата Ишикава и околните области беа потресени од силен последователен потрес со јачина од 4,9 степени во раните утрински часови, меѓу десетиците последователни потреси што следеа по земјотресот со јачина од 7,6 степени по Рихтер пред два дена.
Првите 72 часа се особено критични, велат експертите, бидејќи шансите за преживување значително се намалуваат по три дена.
„Поминаа повеќе од 40 часа. Ова е трка со времето и чувствувам дека сме во критичен момент. Добивме извештаи дека многу луѓе се уште чекаат спас под срушените згради“, изјави премиерот Фумио Кишида за новинарите.
Екипите за помош доставија вода, ќебиња, храна и други потреби. Тесниот пејзаж на полуостровот Ното придонесе за предизвиците при достигнувањето на некои заедници. Во некои области сè уште нема вода, струја и мобилни телефони.
„Ретко која од куќите стои. Тие беа делумно или целосно уништени“, изјави Масухиро Изумија, градоначалник на градот Сузу, кој претрпе голема штета.
Покрај војската и пожарникарите, во потрагата по десетици луѓе за кои се верува дека се заробени се вклучија и кучиња трагачи, иако точната бројка е нејасна.