„Ова е награда за Хамас и им штети на напорите за прекин на огнот“, порача министерството за надворешни работи на Израел, по најавата од Велика Британија дека ќе ја признае Палестина ако Израел не преземе конкретни чекори за прекин на војувањето во Газа и за обнова на мировниот процес.
„Промената на ставот на британската влада во овој момент, по францускиот потег и внатрешните политички притисоци, претставува награда за Хамас и им штети на напорите да се постигне прекин на огнот во Газа и рамка за ослободување на заложниците“, порача израелското МНР преку социјалната мрежа Х.
Israel rejects the statement by the Prime Minister of the United Kingdom.
The shift in the British government’s position at this time, following the French move and internal political pressures, constitutes a reward for Hamas and harms efforts to achieve a ceasefire in Gaza and… pic.twitter.com/CG2tueCYRe
— Israel Foreign Ministry (@IsraelMFA) July 29, 2025
Најавата од британскиот премиер Кир Стармер за потенцијалното признавање на Палестина се случи вчера, неколку дена откако францускиот претседател Емануел Макрон рече дека Франција ќе ја признае Палестина на Генералното собрание на ОН во септември.
Во службеното соопштение од Даунинг Стрит 10 се наведува дека признавањето на Палестина е „неотуѓиво право на палестинскиот народ“ и дека ставот на британската влада секогаш бил дека признавањето ќе биде дел од поширокиот мировен процес. Сепак, „поради сѐ понеподносливата ситуација во Газа и сѐ помалкуто надежи во мировниот процес“, моменталниот контекст бара порешителни чекори.
Стармер истакна дека признавањето ќе уследи ако израелската влада не се согласи на итен и траен прекин на огнот и јасно ангажирање за мировниот процес, со јасна обврска дека нема да се вршат анексии на територија на Западниот Брег (другата палестинска територија, која сепак има многу помалку учество на Палестинците во управувањето отколку што имаше Газа).
Стармер повтори и дека „не се прави изедначување меѓу Израел и Хамас“ и дека остануваат британските барања за Хамас: ослободување на сите заложници, прифаќање прекин на огнот, одрекнување од каква било политичка улога во идното управување со Газа и целосно разоружување.