Генералниот секретар на НАТО Јенс Столтенберг денеска на прес-конференција во Брисел по средбата на министрите за надворешни работи на Алијансата, повтори дека предлогот за Заедница на српски општини може да биде патот напред за изнаоѓање решение и постигнување напредок во дијалогот меѓу Белград и Приштина, пренесува „Косово онлајн“.
Столтенберг уште еднаш подвлече дека во последните неколку месеци се забележани сериозни инциденти на Косово.
„Само што го посетив Косово и она што го видовме оваа пролет беше напад врз мировниците на НАТО. Ранети се 93 војници на НАТО, некои од нив се здобија со рани кои им го променија животот, а тоа е целосно неприфатливо“, изјави Столтенберг.
Тој потсети и на настаните во Бањска, каде загинаа четири лица.
„Тоа ги нагласува предизвиците со кои се соочуваме на Косово и важноста од деескалација од сите страни, да се воздржат од дејствија кои можат дополнително да ги зголемат тензиите и да се воздржат од каква било запалива реторика што може да ги зголеми тензиите. Тоа беше мојата порака на средбите во Приштина и во Белград“, наведе Столтенберг и рече дека на Косово се гледа пример за добра соработка меѓу ЕУ и НАТО и додаде:
„Додадовме повеќе војници на НАТО во нашето присуство на Косово по последните настани, а сега се присутни приближно 5.000 војници на НАТО. Сметам дека предлогот на ЗСО може да биде начин да се обидеме да најдеме решение и да постигнеме напредок во рамките на дијалогот со помош на ЕУ“, подвлече Столтенберг.