149
Тим на СЈО влезе во Телеком и имаше разговор од час и половина со менаџери од најголемиот телекомуникациски оператор.
Стотина новинари, бизнисмени, адвокати и други јавни личности кои испратиле барање, добиле потврда од СЈО дека нелегално биле прислушувани, а добар дел од нив веќе биле и сослушани во рамките на истрагата „Таргет“ . Истражителите очекуваат потврда дека и многу други јавни личности се следени доколку се спроведе постапката за претрес на системот во Телеком преку кој оди следењето на комуникации.
Шест месеци по објавувањето на истрагата за случајот „Таргет“ СЈО конечно влезе во „Македонски Телеком“.
По средбата и од СЈО и од Телеком излегоа со идентичен став. Воспоставена е соработка. Станува збор за истражна постапка и во моментов не можат да соопштат повеќе детали. 
„Во просториите на „Македонски Телеком“ е одржана работна средба на повисоко ниво со преставници на оваа компанија, со цел да се изнајде решение за предметите од интерес на ова Јавно обвинителство. Очекуваме воспоставената соработка да продолжи и во претстојниот период“, стои во кусото соопштение на СЈО.
Средбата во Телеком доаѓа откако Кривичниот суд четири пати не издаде налог за претрес во компјутерскиот систем на мобилниот оператор со цел СЈО да го доистражи случајот за тоа кој масовно прислушувал.
Податоците од Телеком се потребни за СЈО да направи споредба со податоците кои есента ги прибира од УБК, а од кои произлезе дека без судски налог незаконски биле прислушувани 5827 лица во период од 2008 до 2015 година.
За случајот „Таргет“ осомничени се десет лица поранешни и сегашни вработени во УБК кои преку злоупотреба на службената положба без судска наредба внесувале податоци за телефонски броеви во системите за прислушување. Ваквите дејствија биле забележани од лице вработено во УБК, кој прибавил дел од транскриптите што ги правеле осомничените, а воедно прибавил и дел од аудио записите кои преку други лица му биле предадени на лидерот на СДСМ Зоран Заев.
Сепак, при објавувањето на случајот СЈО потенцираше дека докзите упатуваат на сомнение дека незаконското следење на комуникациите продолжило и после обелоденувањето на аферата со прислушкувањето.