Одредени промени во вашето тело може да укажуваат на тоа дека навистина ви треба повеќе сон, од кои некои вклучуваат промени во апетитот, раздразливост и промени на кожата.
Добриот сон е од витално значење за нашето здравје, но многу луѓе не спијат доволно од различни причини. Како што изјави Дејвид Сајц, медицински директор на Ascendant Detox, за Best Life повеќето возрасни луѓе треба да спијат седум до девет часа непрекинато секоја вечер.
Па, како можете да препознаете дали навистина ја добивате целата количина на сон која ви треба? Овие мали нешта можат да бидат знак за лишување од сон:
Пораздразливи сте од вообичаено
Дали ви е потешко да ја одржувате смиреноста овие денови? Ако е така, тоа може да биде поврзано со вашиот ноќен распоред.
„Недостатокот на сон може да ја направи личноста повеќе склона кон раздразливост и промени во расположението“, вели Сајц.
Тој додава дека „кога сме уморни, нашето тело произведува повисоки нивоа на кортизол, хормон поврзан со стрес, анксиозност и депресија.
Покрај тоа, недостатокот на сон може да ја намали нашата способност да ги регулираме нашите емоции во стресни или тешки ситуации“.
Постојано сте болни
Недостатокот на сон е директно поврзан со болести. Всушност, губењето на сонот со текот на времето може да не направи повеќе склони кон болести, според Чарлс Роршаиб, експерт за спиење.
„Длабокиот сон е неопходен за обновување и одржување на многу од нашите биолошки системи, вклучувајќи го и нашиот имунолошки систем. На пример, нашиот имунолошки систем создава нови антитела и бели крвни зрнца кои се одговорни за борба против инфекции додека спиеме“, објаснува таа.
Вашиот апетит се менува
Вашите навики за јадење, исто така, може да варираат кога не спиете добро седум до девет часа секоја вечер, вели Сајц.
„Недостатокот на сон може да влијае на хормоните на нашето тело одговорни за регулирање на апетитот“, објаснува тој.
Како резултат на тоа, може да забележите дека вашето ниво на глад се зголемува или намалува, и најверојатно ќе имате новооткриена желба за нездрава храна како слатки и преработени јаглехидрати.
Имате утрински главоболки
Будењето со главоболка можеби е неизбежно од време на време, но тоа не треба да биде редовен дел од вашата секојдневна рутина.
Според Ненси Мичел, можеби е поголема веројатноста да добиете утрински главоболки ако не се одморите доволно ноќе.
Вашата кожа не изгледа најдобро
Може да забележите физички промени на вашата кожа ако не спиете доволно. Според Кемунто Мокај, дерматолог од Хјустон, тие може да вклучуваат темни кругови под очите, подуени очни капаци, бледило, брчки, акни и сува кожа.
„Недостатокот на сон може да предизвика проширување на крвните садови под тенката кожа околу очите поради слабата циркулација и задржувањето течности во пределот околу очите, што доведува до темни кругови“, објаснува Мокаја, додавајќи дека ова задржување течност може да предизвика и вашите очи да станат подуени.
Недостатокот на сон, исто така, може да го намали протокот на крв во кожата, што може да ја направи да изгледа побледо и може да ја наруши способноста на кожата да ја задржи влагата, што резултира со кожа која се лупи и лесно се иритира.