Висок функционер на Светската здравствена организација рече дека приоритет треба да биде сузбивањето на мајмунските сипаници во неендемичните земји и додаде дека тоа може да се постигне со брза акција.
Мајмунските сипаници, типично лесна вирусна инфекција, е ендемична во африканските земји, но нејзиното ширење во неендемични земји како што се Европа и САД предизвика загриженост. Досега има повеќе од 200 потврдени или сомнителни случаи во околу 20 земји во кои вирусот претходно не циркулирал, пренесува „Ројтерс“.
„Сметаме дека ако ги воведеме вистинските мерки сега, лесно можеме да го спречиме“, рече Силви Брианд, директорка на СЗО за глобална подготвеност за заразни болести, на техничкиот брифинг до земјите-членки на годишното собрание на Агенцијата за здравство на ОН.
Таа нагласи дека постои можност да се спречи натамошното ширење, апелирајќи до пошироката јавност да не се грижи бидејќи преносот е многу побавен од другите вируси како што е коронавирусот.
Претставниците на СЗО рекоа дека во моментов нема потреба од масовна вакцинација, туку целна вакцинација таму каде што е достапна за блиски контакти со заразени лица.
„Истрагата на случаите, следењето на контактите и изолацијата се најдобрите решенија“, рече Розамунд Луис, шеф на Секретаријатот на СЗО за мали сипаници, кој е дел од Програмата за итни случаи на СЗО.