Во продолжението на судскиот процес за воени злосторства, на судскиот совет на Специјализираниот совет во Хаг се обрати првообвинетиот Хашим Тачи, кој изјави дека верува оти судот ќе го ослободи од обвиненијата на крајот од овој процес.
„Кога се појави извештајот на Дик Марти пред 13 години и драматичните наводи дека јас и ОВК тргувавме со органи, побарав независна истрага. Меѓународната заедница ме информираше дека специјалниот суд е од суштинско значење за да се отфрлат и негираат овие наводи. Светот сега знае дека никогаш не постоела жолта куќа, дека не сме виновни ниту ОВК, ниту јас, ниту народот на Косово, а таа темна форма сега е отфрлена. Очекувам да бидам ослободен од сите други обвиненија и тоа ќе биде крај на овој судски процес“, рече Тачи откако неговите адвокати завршија со воведните зборови.
Тој рече дека му е жал што судот нема да може да го слушне сведочењето на Медлин Олбрајт, Ричард Холбрук и другите сојузници на НАТО и САД кои би сведочеле во прилог на неговото тврдење за праведната борба на ОВК на Косово.
Во попладневниот дел од судењето пред судот ќе се обрати Бен Емерсон, адвокатот на Кадри Весељи.