„Србија се соочува со можност за злоупотреба во трговијата со оружје, во време кога повторно е предмет на меѓународна анализа во областа на безбедноста и неисполнување на обврските во борбата против организираниот криминал“, рече поранешниот српски претседател и претседател на Социјалдемократската партија, Борис Тадиќ.
„Моја обврска и одговорност е да кажам дека Србија денес е генератор на криминал во регионот и важен меѓународен фактор во оваа област. Во времето кога бев претседател на Србија, особено во времето кога партијата што ја водев во тоа време ја имаше извршната моќ, постигнавме најголеми резултати во борбата против организираниот криминал во целиот регион. Сè беше срушено по изборите во 2012 година и формирањето на владата на СНС и СПС“, рече Тадиќ, додавајќи дека во функција е „систематската криминализација на српското општество“.
„Последица од тоа е што наскоро секое работно место во Србија ќе биде во сопственост на криминалци. Политичката, шверцерска мафија, тргува со оружје и ја презема контролата врз целиот економски систем на Србија“, истакна поранешниот претседател на Србија, додавајќи дека секој што учествува во сегашната влада има одговорност во криминализацијата на српското општество.
„Еден ден ќе мора да одговараат пред законот. Внимателно го следам однесувањето на сите учесници во политичката дебата, а исто така го следам и однесувањето на опозицијата, која укажува на скандали на сосема погрешен начин. Тие го свртуваат вниманието на јавноста од она што е важно, а тоа е Вучиќ и неговиот политички криминален клан што владее со земјата сите овие години“, рече тој.