Министерот за здравство и лидер на едното крило на Алијансата за Албанците, Арбен Таравари информира дека денеска ќе поднесе оставка од својата позиција во Владата и додаде дека очекува да бидат разрешени останатите функционери кои доаѓаат од редовите на неговата партија.
„Поднесувам оставка“, кажа Таравари во изјава за МИА и додаде дека „другите ќе бидат разрешени“. Тврди дека и двајцата заменици, но и вицепремиерот Арбен Фетаи ќе го следат, иако споменатиот се уште не одлучил дали ќе ја напушти владината коалиција.
Неговата одлука доаѓа откако АА во понеделникот одлучи да ја напушти владината коалиција и да премине во опозиција, по несогласувањата со другите коалициски партнери во коалицијата ВЛЕН. Партијата претходно објави дека ќе ги претстави своите листи на кандидати за советници на претстојните локални избори, на што се противеа останатите лидери од владеачката коалиција составена од повеќе партии.
Премиерот Христијан Мицкоски изјави дека во наредниот период ќе бидат предложени нови имиња за замена на членовите на владата кои беа дел од партиското крило на Таравари.
-Ресорите што ги водеа кадрите на Алијансата за Албанците ќе останат кај коалицијата ВЛЕН или ќе бидат поделени, рече Мицкоски и додаде дека многу работи „ќе станат појасни во наредниот период“. Замерува што функционерите од Алијанса одлучиле да „одат во прегратките на ДУИ и Али Ахмети“.
Меџити и Касами од ВЛЕН уверуваат дека владата е стабилна. Велат дека во фокус се граѓаните, а не да се помага на ДУИ. Сметаат дека ресорот здравство треба да остане кај нив.