Човекот кој стои зад големото протекување на доверливи документи на американската влада е млад, харизматичен ентузијаст за оружје, кој ги споделил документите со своите виртуелни пријатели. Група обединета со љубов кон оружјето, воената опрема и Бог креирала заеднички канал на Discord, онлајн платформа популарна меѓу гејмерите, во 2020 година за време на пандемијата, објави „Вашингтон пост“.
Повеќето членови на каналот не обрнуваа премногу внимание кога човекот кој некои го нарекуваат „OG“ објавил порака исполнета со чудни акроними и жаргони. Еден од членовите објаснил дека зборовите се непознати, па малку луѓе ја читаат долгата порака. Сепак, тој нагласува дека го почитувал „OG“ кој тврдел дека ги знае тајните кои власта ги чува од обичните луѓе.
Затоа, тој внимателно ја прочитал пораката на „OG“, како и стотици други кои редовно биле објавувани во следните месеци. „OG“ им кажал на членовите на групата дека тоа се транскрипти од доверливи разузнавачки документи кои тој ги донел дома од својата работа во „воената база“.
„Документите не протекле случајно“
Тој изјави дека дел од денот го поминува во безбеден објект каде што се забранети мобилни телефони и други електронски уреди погодни за документирање на тајни владини информации.
За време на пандемијата на коронавирус, Discord стана засолниште за тинејџерите кои беа затворени во своите домови и отсечени од нивните пријатели од реалниот свет. Членовите на каналот на „OG“ разменувале шеги, разговарале и гледале филмови, но „OG“ им држел и предавања за меѓународните односи и тајните владини операции.
„Тој е паметна личност. Знаеше што прави кога ги објави овие документи, се разбира. Документите не протекоа случајно“, вели член на каналот.
Тој наведува дека објавените документи се занимавале со низа чувствителни теми како што се местата и движењата на високите политички лидери, тактичките информации за воените сили, геополитичките анализи и напорите на странските влади да се мешаат во изборите.
„Тој е во форма. Вооружен е“
Откако копирањето на стотици доверливи датотеки се покажа премногу досадно, „OG“ почнал да објавува фотографии од самите документи. „Вашингтон пост“ ја доби оваа информација врз основа на разговор со член на каналот Discord. Станува збор за лице кое има помалку од 18 години и „Вашингтон пост“ мораше да добие согласност од мајка му да го интервјуира под услов да остане анонимен.
Неговото сведочење го потврди и друг член кој исто така прочитал многу доверливи документи. Двајцата членови рекоа дека го знаат вистинското име на „OG“, како и државата во која живее и работи, но одбија да ги споделат тие информации додека ФБИ го истражува изворот на протекувањето.
Истрагата е во рана фаза, а Пентагон воспостави сопствен внатрешен преглед предводен од висок функционер. Discord во соопштение нагласи дека соработува со полицијата.
Младиот член на каналот Discord бил импресиониран од навидум пророчката способност на „OG“ да ги предвидува главните настани пред тие да станат насловни вести.
„Тој е во форма. Силен е. Вооружен е. Трениран. Отприлика се што би очекувале од некој луд филм“, рече тој.
„Се закани дека повеќе нема да ни испраќа документи“
„Вашингтон пост“ имал пристап до видео на кое се гледа маж, а членот на каналот потврдил дека се работи за „OG“. Човекот од споменатото видео стои на стрелиште, носи заштитни очила и држи пушка. Тој извикува низа расни и антисемитски навреди во камерата, а потоа испукува неколку куршуми кон целта.
„Јас бев еден од ретките луѓе на серверот кој можеше да разбере дека овие (документи) се легитимни. Се чувствував како да сум на врвот на Монт Еверест. Се чувствував како да сум нешто над сите други и дека … ги знаев работите кои другите не ги знаеја“, изјави член на групата.
„OG“ бил неприкосновен лидер. Членот го опишал како „строг“. Тој тврди дека очекувал другите внимателно да ги прочитаат доверливите информации кои ги споделил и дека би се налутил доколку нивното внимание опадне. Другите членови на каналот беа позаинтересирани за видеата на YouTube со борбена опрема. Тој нагласува дека „OG“ се заканил дека нема да им испраќа повеќе документи.