Американскиот претседател Доналд Трамп и понуди поддршка на лидерката на француската екстремна десница Марин Ле Пен, откако судот во Париз ја осуди неа и дваесетина луѓе од нејзината партија Национален собир (РН) за проневера на средства од Европската унија, пренесува Хина.
Судијата ѝ забрани на Ле Пен пет години да се кандидира на избори, што ќе ја спречи да учествува во претседателската трка во 2027 година, освен ако не може да се жали на одлуката.
Судијата сега е под полициска заштита, откако добил смртни закани, изјави извор за Ројтерс.
Ле Пен, нејзините партиски сојузници и поддржувачи го обвинија судот за мешање во демократијата.
Францускиот премиер Франсоа Бајру во вторникот рече дека „безусловно го поддржува“ судството.
Во објавата на Truth Social доцна во четвртокот, Трамп го нарече случајот против Ле Пен „лов на вештерки“ и го пофали лидерот на екстремната десница.
„Таа претрпе загуби, но продолжи и сега, непосредно пред она што би било голема победа, таа е фатена со мал прекршок за кој веројатно не знаела. Мене ми звучи како книговодствена грешка“, напиша Трамп во објавата.
Активистите за човекови права правеа споредби меѓу Ле Пен и Трамп во текот на годините поради нивните антиимигрантски ставови и антималцинската реторика.
Пресудата на францускиот суд претставува пречка за 56-годишната Ле Пен. До нејзиното осудување, таа беше фаворит во анкетите пред претседателските избори во 2027 година.
Трамп ја спореди ситуацијата на Ле Пен со неговата. Трамп е обвинет за фалсификување деловни досиеја за да ѝ плати на порно ѕвезда во замена за нејзиното молчење за нивната сексуална врска, за обид да ги поништи резултатите од претседателските избори во 2020 година и за задржување доверливи документи по завршувањето на неговиот прв мандат.
Тој беше прогласен за виновен во случајот за фалсификување деловни книги. Во сите случаи, кои ги нарече политички мотивирани, ја негираше вината. Федералните обвиненија против него беа отфрлени откако тој победи на изборите во 2024 година.
„Сето ова е многу лошо за Франција“, додаде Трамп во својата објава.