Претседателот на САД, Доналд Трамп, се закани дека ќе воведе царини до 35 проценти на јапонските стоки ако двете земји не успеат да постигнат трговски договор до крајниот рок на 9 јули.
Во разговор со новинарите во „Ер Форс Уан“, тој рече:
„Преговаравме со Јапонија. Не сум сигурен дека ќе склучиме договор. Искрено се сомневам во тоа.“
Заканата доаѓа откако сè поагресивната царинска политика на Трамп предизвикува неизвесност во глобалната трговија со месеци, објави Би-Би-Си.
Јапонскиот вицепремиер Казухико Аоки одби да ги коментира изјавите на Трамп, велејќи дека Токио не реагира на секоја изјава дадена од американските претставници.
Сепак, главниот секретар на кабинетот на Јапонија, Јошимаса Хајаши, јасно стави до знаење дека Јапонија нема да прави отстапки што би можеле да им наштетат на домашните земјоделци, исклучувајќи ја можноста за отворање на пазарот за американскиот ориз – тема што Трамп особено ја истакна.
„Тие нема да ни го земат оризот, а имаат огромен недостиг од ориз“, напиша Трамп на својот профил на социјалните мрежи Truth Social, критикувајќи го она што го нарече како светот се навикнал да ја искористува отвореноста на Америка во трговијата.
Поголемиот дел од јапонскиот извоз во САД моментално е предмет на царина од 10 проценти, додека царината за увоз на јапонски возила и делови е 25 проценти, а за јапонски челик и алуминиум е 50 проценти.