Претседателот на САД, Доналд Трамп, денес ги отфрли резултатите од анкетата, според кои неговиот ривал Џо Бајден има предност, и изјави дека не знае дали ќе ги прифати резултатите од изборите во ноември.
„Прво и најважно, јас не губам бидејќи ова се анкети без врска“, рече Трамп во интервју за „Фокс њуз“.
Според анкетата на „Фокс њуз“ објавена денес, Бајден има поддршка од 49 проценти од гласачите, а Трамп е поддржан од 41 процент од гласачите.
– Не сум добар губитник. Не сакам да губам. Не губам премногу често. Едноставно не сакам да губам“, рече Трамп.
На прашањето дали ќе ги прифати резултатите од изборите ако победи Бајден, Трамп одговори: „Треба да видам, нема да кажам само „да“.
Тој, исто така, ги оспори менталните способности на неговиот противник, тврдејќи дека Бајден е „неспособен да состави две реченици“.
На прашањето дали смета дека Бајден е сенилен, тој одговори дека не сака да го коментира тоа, но дека смета дека не е компетентен да биде претседател.
– За да бидете претседател, мора да бидете остри, тврди и многу други работи, а тој дури и не излегува од својот подрум! Така не се води кампањата – рече Трамп и додаде дека не се сомнева во неговата победа на изборите.