Судот во Њујорк му наложи на поранешниот американски претседател Доналд Трамп да плати речиси 400.000 долари за правни такси на „Њујорк тајмс“ и тројца истражувачки новинари, откако тој неуспешно ги тужеше поради приказната за богатството и даночните практики на неговото семејство, добитник на Пулицерова награда во 2018 година.
„Њујорк тајмс“ и новинарите Сузан Крег, Дејвид Барстоу и Расел Бетнер беа ослободени во мај, а тужбата на Трамп против неговата братучетка Мери Трамп, со тврдење дека таа го прекршила претходниот договор за спогодување давајќи им даночни информации на новинарите, сè уште е во тек, пренесува АП.
Њујоршкиот судија Роберт Рид рече дека, со оглед на „сложеноста на прашањата“ и други фактори, разумно е Трамп да биде принуден да плати вкупно 392.638 американски долари на адвокатите и новинарите на „Тајмс“ за правни такси.
„Денешната одлука покажува дека новиот став на државата против тужбите SLAPP може да биде моќна сила во заштитата на слободата на печатот“, рече портпаролката на „Тајмс“, Даниел Родес Ха, мислејќи на њујоршкиот закон кој забранува несериозни тужби дизајнирани да ги замолчат критичарите.
„Судот испрати порака до оние кои сакаат да го злоупотребат судскиот систем да се обидат да ги замолчат новинарите“, рече Родес Ха.
Трамп, кој бараше отштета од 100 милиони долари, тврдеше дека Мери Трамп, „Тајмс“ и печатот биле „мотивирани од лична одмазда“ против него. Тој ги обвини дека учествувале во „подмолен заговор за да добијат доверливи и високо чувствителни записи кои ги користеле во своја полза“.
Во отфрлањето на тужбите против Тајмс и новинарите, судијата Рид напиша дека законското собирање вести „е во срцето на Првиот амандман“.