Администрацијата на претседателот Доналд Трамп ќе понуди 1.000 долари и финансиска помош за патување на сите мигранти кои ќе се одлучат доброволно да го напуштат САД, соопшти Министерството за внатрешна безбедност. Понудената сума, вклучувајќи ги и евентуалните трошоци за авионски билети, би била поефтина од процесот на депортација, кој во просек чини околу 17.000 долари по лице.
Претседателот Трамп, кој се залага за построги имиграциски политики, вети дека ќе депортира милиони недокументирани мигранти откако ја презеде функцијата во јануари, но во моментов неговата администрација заостанува зад претходниот претседател, Џо Бајден, во бројот на депортирања. Според податоците на Министерството, администрацијата на Трамп депортирала 152.000 лица од 20 јануари, што е помалку од 195.000 депортирани во истиот период минатата година, кога Бајден беше на власт. Трамп го претстави планот во април, изјавувајќи дека САД ќе ја разгледаат можноста за враќање на мигрантите кои доброволно се депортираат.
„Ако се добри, ако сакаат да се вратат, ќе соработуваме со нив за да ги вратиме што е можно поскоро“, изјави Трамп во таа прилика.
Министерството за внатрешна безбедност потврди дека мигрантите кои доброволно ќе ја напуштат земјата можат да придонесат за понатамошни можности за легално враќање во САД, но не беа дадени конкретни детали за методите или програмите кои ќе се применуваат.