Американскиот претседател Доналд Трамп изјави дека Израел има „доста од свои проблеми без да ја киднапира Грета Тунберг“, откако беше запрена хуманитарната флота со која таа патуваше кон Газа.
Американскиот претседател ја опиша шведската активистка како „лута млада личност“ откако нејзиниот обид да ја пробие блокадата на Газа беше спречен од израелската морнарица.
„Таа е чудна личност. Млада, лута личност. Не знам дали тој гнев е вистински. Тешко е да се поверува, искрено, но видов што се случи. Таа е дефинитивно поинаква… Мислам дека ѝ треба курс за управување со гневот“, рече Трамп.
Во понеделник, израелските поморски сили се качија и запленија хуманитарен брод, на кој беше и Грета Тунберг. Британскиот едриличар „Мадлин“, управуван од пропалестинската коалиција „Freedom Flotilla“, имаше за цел да достави симболична количина помош во Газа и да ја подигне меѓународната свест за хуманитарната криза во областа.
„Ако го гледате ова видео, бевме пресретнати и киднапирани од израелските окупациски сили или сили што го поддржуваат Израел во меѓународни води“, рече 22-годишната Тунберг во видео порака објавена од Коалицијата „Freedom Flotilla“, снимена пред да биде запленет бродот.
„Ги повикувам сите мои пријатели, семејство и другари да извршат притисок врз шведската влада да ме ослободи мене и другите што е можно поскоро“.
Трамп го отфрли тврдењето на Тунберг дека била киднапирана, велејќи: „Мислам дека Израел има доволно проблеми без да ја киднапира Грета Тунберг“.
Ова не е прв пат Грета Тунберг и американскиот претседател да се судрат.
Пред пет години, Тунберг јавно го покажа својот презир кон Трамп кога, тогаш како 16-годишна девојка, му фрли леден поглед по неговото пристигнување во Обединетите нации.
Нејзиниот поглед, кој се појави пред нејзиниот говор за климатските промени во ОН, стана вирален на интернет.
Во февруари оваа година, потпретседателот на САД, Џеј Ди Венс, ја искористи можноста да ја исмее Тунберг за време на говорот на Минхенската безбедносна конференција, бранејќи ја улогата на Елон Маск во администрацијата на Трамп.
„Верувајте ми, го кажувам ова со допир на хумор – ако американската демократија преживеа десет години од приговарањето на Грета, вие можете да преживеете неколку месеци од Елон Маск.“