Поранешниот американски претседател Доналд Трамп синоќа ја обвини администрацијата на актуелниот претседател Џозеф Бајден за тоа што беше прогласен за виновен за прикривање пари и фалсификување деловни документи.
„Целата наша земја е лажна во моментов. Ова беше направено од администрацијата на Бајден за да повреди противкандидат, политички противник“, им рекол Трамп на новинарите додека ја напуштал судницата, откако бил прогласен за виновен по 34 точки од обвинението.
Трамп најави дека ќе продолжи да се бори.
„Ќе се бориме до крај и ќе победиме затоа што нашата земја отиде во пеколот… Ќе се бориме за нашиот Устав. Ова сè уште не е завршено“, додал тој пред судницата на Менхетен.
Претседателот на Претставничкиот дом, Мајк Џонсон ја нарече пресудата за поранешниот претседател „срамен ден во американската историја“.
Џонсон, исто така, го обвини правосудниот систем дека е „вооружен“ и го опиша судењето како „чисто политичка вежба, а не правна“.
„Американскиот народ го гледа ова како закон и знае дека е погрешно и опасно. Претседателот Трамп со право ќе поднесе жалба на оваа апсурдна пресуда и ќе победи“, потенцирал Џонсон.
Против поранешниот претседател се поднесени уште три обвиненија, но тие судења не се очекува да се одржат пред ноемвриските избори.
Трамп се изјасни за невин и во тие случаи.
Доналд Трамп е првиот претседател во историјата на САД кој е осуден за кривично дело.