Американскиот претседател Доналд Трамп потпиша извршен указ со кој се наметнуваат повисоки царини за увозот од десетици земји ширум светот, за „глобалната трговија да се преструктурира во корист на американските работници“, соопшти Белата Куќа. Сепак, за разлика од претходно најавеното, новите царини ќе стапат на сила на 7 овој месец, а не денеска.
Новите царини се движат од 10% до 41%, со највисока царина за Сирија. Европската Унија, Јапонија и Јужна Кореја ќе подлежат на тарифи од 15%, исто како и Македонија. Србија ќе се соочи со царини од 35 отсто, а Босна и Херцеговина од 30 отсто.
Трамп ги зголеми царините за десетици земји, за Македонија ги намали за 18%
Белата Куќа: Канада не соработуваше во сузбивање на фентанилот
Белата Куќа во документот наведе дека целта на царините е „преструктуирање на глобалната трговија во корист на американските работници“ и тие ќе стапат на сила на 7 август, а не денеска, како што се најавуваше. Царините за канадската стока зголемуваат од 25% на 35%, но тие ќе бидат на сила од петок.
„Како одговор на континуираната неактивност и одмаздата од Канада, претседателот Трамп сметаше дека е неопходно да се зголеми царината за Канада од 25 отсто на 35 отсто, за ефикасно да се реши постојната вонредна ситуација“, се вели во соопштението на Белата Куќа, во кое се порачува дека Канада не соработувала во сузбивањето на фентанилот и другите нелегални дроги.
Мексико доби одложување од 90 дена
Од царините се изземени канадските производи опфатени со трговскиот договор помеѓу САД, Мексико и Канада. Канадскиот премиер Марк Карни во јуни рече дека во случај да не се постигне договор до почетокот на август, Канада најверојатно ќе возврати со дополнителни царини на увозот на челик и алуминиум од САД.
Повисоките царини за канадска стока се во остар контраст со одлуката на Трамп да го одложи зголемувањето на царините за Мексико за 90 дена за да обезбеди повеќе време за преговори за поширока трговска спогодба.
Кина, пак, има рок до 12 август за постигнување долгорочен договор со администрацијата на Трамп, откако Пекинг и Вашингтон ги постигнаа своите први договори во мај и јуни за ставање крај на зголемените меѓусебни царини и укинување на забраната за увоз на ретки земни минерали.