Во Северна Македонија почнува да се создава вистински социјален дијалог од кој можеме да очекуваме прогрес во делот на политиките за трудот што ќе биде добар за сите, истакна министерката за труд и социјална политика, Мила Царовска, на денешната панел-дискусија „Синдикално здружување во минатото и сега“ на Текстилијадата во Штип.
Според министерката, во минатото синдикалните организации биле само фигура и не носеле одлуки, и за нив тоа го правела државата, но сега има процес во кој работите се изменети.
-Синдикатите кои се гласот на работниците се вклучени во создавањето на сите закони кои ги засегаат работниците и за истите се води здрав дијалог. Во овој дијалог се вклучени и работодавачите и државните институции и експертите, и ова навистина ме радува. Во завршна фаза е креирањето на целосно нов закон за работни односи и Владата нема да го усвои се додека не се постигне договор за отворените прашања којшто ќе биде во интерес на сите, истакна Царовска.
Потенцираше дека преку дијалог со работниците оштетени во процесот на транзицијата, се постигна денеска да има 11.000 стечајци кои се материјално обезбедени со месечен надомест до нивно пензионирање. Со новиот закон што неодамна го усвои Владата, таа вели дека нивната бројка ќе се зголеми на 12.000.
– Во преговори сме и за зголемување на минималната плата и тоа наскоро ќе се случи. Барањето произлезе од синдикатите, и низ конструктивен разговор со работодавачите можам да кажам дека сме блиску до договор, рече Царовска.
Генералниот секретар на Синдикатот за индустрија, енергетика и рударство, Маре Анчева забележа дека 200.000 работници годишно потпишуваат договори на определено време, но работодавците наместо во утврдениот законски рок да им го трансформираат работниот однос на неопределено, со години ги вработуваат на овој начин. Во новиот закон бараат да се органичи бројот на работници на определено работно време кај еден работодавач Од синдикатот за индустрија, енергетика и ридарство велат дека има фабрики со илјадници работници, кои вакви договори склучуваат на еден, два или три месеци. Смета дека на овој начин работниците се несигурни и ова е една од причините што тие од страв не се и синдикално организираат.
Работодавците на денешната дебата за новиот закон за работни односи на третата Текстилијада сметаат дека и стариот закон не е толку лош, но од новиот очекуваат допрецизирања во одредени делови, бидејќи секој си дозволува различно да го толкува, а посебно при судските одлуки. Ангел Димитров од Организација на работодавачи е против злоупотребата на работничките права во одредени фирми, а веќе какошто вели фирмите се и под притисок на странските партнери ова да го анулираат.
На третата Текстилјада во Штип во организација на Гласен Текстилец-Штип на отворените дебати на коишто првпат присуствуваат сите засегнати страни, беше потенцирано дека дијалог мора да има, со цел да се анулираат злоупотребите на работничките права, а како едно од решенијата беше посочено и зајакнување на капацитетите на Трудовиот инспекторат.