Француската полиција денеска соопшти дека уапсила брачен пар кој ноќта во вторник кон среда прецизно ги насликал Давидовите ѕвезди на куќи во еврејска сопственост во Париз. Јавноста беше прилично изненадена кога беше објавено дека брачната двојка е од – Молдавија.
Неименуваниот пар – 33-годишен маж и 29-годишна жена од Молдавија – биле уапсени откако сведоци ги виделе како го исцртуваат симболот на јудаизмот на ѕидовите на 15 згради каде живеат Евреи или каде што се наоѓаат еврејски организации.
Двојката е во притвор, а француските власти одлучуваат дали да ги депортираат.
Бројни графити со Давидови ѕвезди се појавија во околината на Париз во последните денови, по антисемитските инциденти за кои француските политички лидери велат дека „ги потсетуваат на 1930-тите“.
Околу 60 Давидови ѕвезди беа насликани на ѕидовите на куќите во 14-тиот кварт на Париз во понеделникот вечерта, објави Би-Би-Си, кој наведува дека Франција се бори со нагло зголемување на антисемитските инциденти.
Повеќе од 850 вакви инциденти се пријавени во Франција откако Хамас го нападна Израел на 7 октомври, изјави министерот за внатрешни работи Жералд Дарманин.