Двајца српски државјани, на возраст од 46 и 48 години, се уапсени под сомнение дека украле часовници и накит во вредност од повеќе од половина милион евра во Сани, Халидики, минатиот септември, објави грчката полиција.
Осомничените се уапсени во Бугарија и Хрватска, а се чека одлука за нивна екстрадиција.
Грчкиот портал „Прототема“ наведува дека уапсените српски државјани се членови на криминалната група „Пинк Пантер“.
Како што е наведено, членовите на криминалната организација влегле во Грција во различно време и, користејќи лажни пасоши, изнајмиле автомобили со украдени регистарски таблички.
„Пред грабежот, со детален план, го извидувале подрачјето, додека користеле возила и електрични скутери за да избегаат“, се додава во соопштението.
Грчката полиција истакнува дека за време на грабежот, 48-годишникот, заедно со непознат соучесник, под закана со пиштол онеспособиле двајца вработени и одзеле луксузни часовници и други предмети со вкупна вредност од 579.805 евра.
Во исто време, 46-годишниот маж и непозната женска личност имале споредна улога, преправајќи се дека се муштерии и набљудувајќи ја околината.
„Прототема“ пишува дека против двајца државјани на Србија се издадени европски потерници, врз основа на кои тие се уапсени во Бугарија и Хрватска. Грчката полиција потсетува дека грабежот се случил на 2 септември 2025 година.