Во извештајот на Европската унија оваа недела ќе се наведе дека Украина исполнила два од седумте услови за почеток на преговорите, споделиле два извори од ЕУ, додека Европската комисија одлучи да го нагласи напредокот и покрај воената состојба предизвикана од руската агресија.
Во многу симболичен потег, ЕУ го гарантираше формалниот кандидатски статус на земјата пред една година – четири месеци откако Русија ја нападна земјата додека се обидуваше да ја продолжи својата интеграција со Западот.
Но, Европската унија постави седум услови – вклучително судските реформи и крај на ендемската корупција – за да ги поттикне преговорите за пристап. Украина побара преговорите да започнат оваа година.
Извештајот на Европската унија е пресвртница во тој процес, за кој поддржувачите на брзиот пристап на Украина во Европската унија се надеваат дека ќе кулминира со одлуката на 27 земји-членки во декември да започнат преговори со Киев.
Двајца високи претставници на ЕУ запознаени со извештајот, цитирани од „24 сата“, кој сè уште не е објавен во јавноста, изјавија дека Украина досега исполнила два критериуми. Еден од функционерите рече дека тие два критериуми се однесуваат на правната реформа и законот за медиуми и додаде дека фокусот бил на позитивните случувања.
„Има напредок. Извештајот ќе биде умерено позитивен“, рекло лицето кое сакаше да остане анонимно. „Не се работи за разубавување на реалноста, туку за препознавање на напредокот, може да се именуваат на пример истакнати антикорупциски случаи“.
Украина реши неколку случаи на корупција на високо ниво во последниве месеци, вклучувајќи го и затворањето на шефот на Врховниот суд поради наводен поткуп од 2,7 милиони долари.
Покрај построгите напори за казнување на корупцијата, други критериуми вклучуваат реформи на украинскиот Уставен суд и полицијата, мерки против перење пари, како и закони за спречување на олигарсите и заштита на правата на националните малцинства.
Извештајот, опишан како итно ажурирање пред поформална проценка во октомври, прво ќе биде испратен до 27 национални претставници во среда во Брисел, а потоа и до министрите за надворешни работи на ЕУ кога ќе се сретнат во четврток во Стокхолм.
27-те земји-членки ќе го имаат последниот збор за тоа дали и кога ќе ги отворат пристапните преговори со Киев.