Американското Министерство за правда замрзна 2 милијарди долари кои дојдоа од Русија на сметките на американската банка JP Morgan, објави Wall Street Journal, повикувајќи се на свои извори.
Според весникот, овие пари требало да бидат наменети за изградба на првата турска нуклеарна централа „Акују“. Како што е соопштено, „Газпромбанк“ требаше да обезбеди заем од 9 милијарди долари за изградба на нуклеарна централа: Во летото 2022 година преку американската банка „Сити“ беа префрлени три милијарди долари на „сметката на нуклеарната централа во (турската државна банка) „Зират“, а уште две милијарди долари беа префрлени преку банката JPMorgan . И следната исплата требаше да биде во износ од две милијарди долари, но таа беше замрзната со одлука на американското Министерство за правда. Според весникот, дел од тие пари можеле да отидат на руски фирми кои имале сметки во „Зират“.
Минатата година американското Министерство за правда размислуваше да ја конфискува сумата, но администрацијата во заминување на поранешниот американски претседател Џозеф Бајден одлучи да ги замрзне парите „за да не ја налути Турција“, пишува весникот.
Нуклеарната централа „Акују“ е првата нуклеарна централа во Турција изградена од руската државна корпорација „Росатом“. Проектот вклучува четири енергетски блокови со реактори од генерацијата VVER III+ од руски дизајн. Капацитетот на секој ќе биде 1.200 мегавати. Според одредбите на меѓудржавниот договор, првиот блок на нуклеарната централа треба да биде пуштен во употреба во рок од седум години по добивањето на сите дозволи. Со оглед на тоа што дозволата за изградба на првиот блок е добиена во 2018 година, рокот за негово пуштање во употреба е 2025 година, пренесе Спутник.