Утре (19 декември) е големиот христијански празник Свети Никола, а голем број православни верници вечерва (18 декември) прават заслуг во чест на светецот и го земаат како домашна слава.
Свети Никола се смета за заштитник на морињата. На христијанските бродови обично се наоѓа иконата на светителот, а спроти денот на славењето бродовите застануваат каде и да се наоѓаат, се фрла сидрото во морето, морнарите ќе се помолат и ќе прославуваат цел ден, а утредента ќе го продолжат пловењето.
Се верува дека луѓето ги штител од секакви неприлики, но сепак во народното предание најповеќе е запаметен како господар на водите, на морињата, а со тоа и заштитник на корабите и на патниците што патувале со нив. Затоа, пред него се молат особено оние што тргнуваат на пат по вода. Во македонските народни преданија се раскажува дека еднаш кога патувал по вода бродот потонал, а тој шест недели поминал на една штица. За цело време се молел на Бога да го спаси, а Господ не само што го спасил, туку затоа што бил исполнет со верба кон Бога и што го молел го назначил за заштитник на морепловците.
Чувар на Божествената вистина, овој чудесен Божји светител бил и одважен заштитник на правдата меѓу луѓето, насекаде сеејќи мир и благодат. Двапати спасил по тројца луѓе од незаслужена смртна казна.
Милостив, вистинољубив и праведен, уште за време на животот луѓето го сметле за светител и го повикувале на помош во маки и неволји; им се јавувал во сон и на јаве на тие што го повикувале, еднакво лесно дали се блиску или далеку и им помагал.
Во Македонија голем број семејства го слават како домашна слава. Бидејќи се паѓа за време на големите божикни пости, трпезата е секако, посна, а на масата се принесува најчесто грав, риба, посна сарма и салата од варени компири и кромид.
Свети Никола Чудотворец е познат и во другите припадници на верите, а многу цркви и храмови во светот му се посветени нему или се изградени во негова чест.
https://standard.mk/shto-treba-da-ima-na-slavskata-trpeza-za-sveti-nikola/