Варијантата „омикрон“, која Светската здравствена организација (СЗО) ја нарече „загрижувачка варијанта“, пристигна во Белгија откако беше откриена во Јужна Африка.
СЗО предупреди дека прелиминарните докази сугерираат дека варијантата има зголемен ризик од повторна инфекција и може да се шири побрзо од другите варијанти. Бројни фармацевтски компании најавија дека работат на прилагодување на своите вакцини во позадина на појавата на омикрон, пренесе германската агенција ДПА.
Британскиот министер за здравство, Саџид Џавид рече дека постои „голема загриженост во светот“ поради новиот вид и дека се воведени забрани за летови од Јужна Африка, Боцвана, Лесото, Есватини, Зимбабве и Намибија со цел да се ограничи неговото ширење.
Џавид им рече на британските пратеници дека постои загриженост дека новиот вид може да се пренесе побрзо, што би можело да ги направи вакцините помалку ефикасни.
Професорот Џон Едмундс, советник на британската влада и член на Научната советодавна група за итни случаи (Sage), предупреди дека преклопувањето на варијантите – делта сој кој веќе ја пустоши Британија и омикрон, може да создаде „многу, многу, многу тешка ситуација“.
ЕУ, САД и Канада го следеа потегот на Велика Британија да воведе ограничувања за патување на патниците од Јужна Африка пред СЗО да ја додаде варијантата Б.1.1.529 во категоријата за највисока опасност.
Експертите на СЗО рекоа дека постојат први докази дека омикрон има „зголемен ризик од повторни инфекции“, а неговото брзо ширење во Јужна Африка сугерира дека има силен потенцијал за раст.
Фармацевтската компанија „Новавакс“ објави дека „веќе започнала со развој на нов рекомбиниран „спајк“ протеин врз основа на познатата генетска секвенца B.1.1.529 и дека ќе биде подготвена да започне со тестирање и производство во следните неколку недели“.
Модерна објави: „Од почетокот на 2021 година, Модерна ја унапреди сеопфатната стратегија за предвидување нови варијанти на загриженост. Оваа стратегија вклучува три нивоа на одговор доколку моментално одобрената доза од 50 (микрограми) засилувачка доза на mRNA-1273 се покаже недоволна за зајакнување послаб имунитет против омикрон варијантата“.
„Фајзер“ и „Бајонтек“ објавија дека во случај варијантата да може да го избегне ефектот на вакцината, компанијата очекува „да може да развие и произведе приспособена вакцина против таа варијанта за околу 100 дена, во зависност од законското одобрение“.
„Џонсон и Џонсон“ изјавија дека веќе ја тестираат нивната вакцина со единечна доза Јансен на омикрон и дека „внимателно ги следат“ мутациите на „спајк“ протеинот.
„Исклучително е важно да се истражи оваа нова варијанта“, рече Кирил Дмитриев, шеф на рускиот фонд за директни инвестиции (РДИФ), кој го финансираше развојот на Спутник V, во интервју за РТ. „ Мислам дека руските научници многу брзо ќе ја прилагодат Спутник V на оваа нова варијанта“, додаде тој.
Тој напомена и дека одржал состанок со кинеските производители на вакцини, на кој се разговарало за можната соработка во производството и повика на продлабочување на меѓународната соработка за создавање на поширок опсег на вакцини за можни поопасни соеви на вирусот.
Ниту еден случај на новиот вид не е откриен во Британија, но неговото пристигнување во Белгија – откако беше пронајдено во Боцвана, Хонг Конг и Израел – предизвика загриженост.
Марк Ван Ранст, вирусолог од Институтот Рега во Белгија, вели дека варијантата била потврдена кај патник кој се вратил од Египет на 11 ноември, а првите симптоми ги имал само 11 дена подоцна.