Бугарската телевизија „БТВ“ објави видео од вчерашниот напад на бугарскиот клуб „Цар Борис Трети“ во Охрид. Според снимката, се гледаат три маскирани лица како се доближуваат до објектот и почнуваат да го каменуваат стаклото од излогот, како и таблата со натписот.
Министерството за надворешни работи на Бугарија најостро го осуди ваквиот немил настан. Ова е втор напад врз клубот за помалку од два месеци.
Според нив, имињата на бугарските клубови не се причина за таа кампања и потенцираат дека „лидерот на најголемата опозициска партија во Скопје веќе отворено повикува на итно затворање на бугарските клубови само затоа што се бугарски, без разлика како се нарекуваат”.
-Убедени сме дека Министерството за надворешни работи на Република Северна Македонија ќе има навремена и соодветна реакција на она што се случи, се наведува во ставот.
Клубот „Цар Борис Трети“ во Охрид беше отворен на 7 октомври проследен со протести на граѓани, со поддршка од опозициските Левица и ВМРО-ДПМНЕ.
Според последните измени кои беа направени во Собрание врз Законот за здруженија и фондации, бугарските културни центри со контроверзни имиња во земјава имаат рок од три месеци да ги променат називите на здруженијата.
Во меѓувреме законот е испратен во Венецијанската комисија.