Младинската организација на бугарската ВМРО-БНД излезе со остар став против Бугарската национална телевизија (БНТ), обвинувајќи го јавниот медиум за повлекување од програма на документарен филм за прогонот на Бугарите во Македонија.
Националниот комитет на млади патриоти смета дека има политичко мешање и дека филмот на Милена Милотинова „Само затоа што беа Бугари“, снимен во 1999 година, е повлечен поради посетата на македонскиот премиер Димитар Ковачевски на Бугарија.
ВМРО-БНД излезе на мирен протест пред БНТ и го прикажуваше филмот на фасадата на телевизијата.
„Филмот, кој требаше да се емитува на БНТ, всушност зборува за крвавиот Божиќ (во 1945 година) и за масакрираните македонски Бугари кои беа убиени не затоа што згрешиле, туку затоа што биле Бугари и ја бранеле својата националност“, изјавиле присутните на протестот.
Според еден од демонстрантите, постои политичко влијание за неемитување на филмот и инсистираат на време за емитување на телевизијата, кога има најголема гледаност.
„Сите Бугари, ако случајно заборавија што се случи, што им направија на нашите браќа и сестри од другата страна на границата во Македонија, да се сетат и повторно да дознаат“, повикал демонстрант пред зградата на телевизијата.