„Во Општина Чаир, изградбата на над 150 згради без дозволи, без статички и сеизмички стандарди и без никаква институционална контрола, претставува не само урбан криминал и сериозна опасност за граѓаните, туку и средство за политички притисок врз лидерите на овие партии што ги претпочита премиерот Христијан Мицкоски, кои сега станаа послушни алатки на антиевропската и антиалбанската агенда на Владата“. Ова се наведува во реакцијата на ДУИ, според која, ВМРО-ДПМНЕ ги создала и избрала ВЛЕН затоа што се уценливи и контролирани преку досиеја отворени во Обвинителството.
Партијата на Али Ахмети тврди дека „Албанците никогаш нема да ја прифатат оваа фарса на претставување, каде што нивниот глас е заменет со луѓе понижени од страв од кривично гонење“.
-Ова е намерен проект за поткопување на меѓуетничката рамноправност, за поништување на Охридскиот договор и за тргнување на земјата од европскиот пат, тврдат од ДУИ преку соопштение.
Обвинителството вчера отвори истрага за дивоградба во Чаир, но таа зграда не е во листата на дивоградби кои ги објавуваше градоначалничката Данела Арсовска. Како што соопштија од Обвинителството, објектот почнал да се гради во 2024 година, без одобрение и на државно земјиште на улицата Кемал Сејфула во Чаир. Осомничениот, како управител на правно лице, се јавува како инвеститор на градбата – станбена зграда со деловни простории и катност приземје, шест ката плус поткровје, наменети за продажба.