СДСМ упати низа критики кон градската администрација за состојбите во скопската Зоолошка градина. Обвинуваат дека ВМРО-ДПМНЕ и градоначалничката Данела Арсовска ја претвориле установата во хорор филм.
-Последните информации дека угинала слоницата Даела за која нема никаква јавна информација од кои причини е кулминација на негрижата и уништувањето на ова прекрасно место. Видеото кое кружи по социјaлните мрежи од транспортот на животното до Дрисла е врв на иживувањето.
Во последните месеци и години угинаа многу животни, две жирафи, тигар, коњи и други животни, порачуваат од најголемата опозициска партија.
Дел од медиумите денеска објавија дека угинала слоницата, иако се уште нема официјални информации за причината за смртта. Наспроти тоа, се појавија и информации дека била еутанизирана поради долга болест што ја имала, но без детали за неа и дали постоело лекување и како била третирана.
Моментално во Зоолошката градина остана само слоницата Дуња.
Оваа серија на трагедии ја доведува во прашање грижата и условите во кои се држат животните во скопската Зоолошка градина. Јавноста бара одговори и транспарентност од управата на зоолошката градина, како и итни мерки за подобрување на условите и грижа за животните.