Внуката на Трамп објавува мемоари во кои открива мрачни семејни тајни

Книгата, напишана од Мери Трамп, ќерка на постариот брат на Трамп, Фред Трамп, „Премногу и никогаш не е доволно: Како моето семејство го создаде најопасниот човек во светот“, излегува на 28 јули, соопшти издавачката куќа „Сајмон и Шустер“.

Иако се објавени бројни критични дела за изборот и мандатот на Трамп, за првпат член на семејството Трамп сведочи за него.

Книгата излегува среде кампањата за американските претседателски избори на 3 ноември, на кои Трамп се кандидира за својот втор мандат.

Во таа книга од 240 страници, таа пишува за настаните за кои била сведок во куќата на нејзините баба и дедо во Њујорк.

„Таа опишува кошмар и трауми, деструктивни врски и трагична мешавина на занемарување и злоупотреба“, велат од издавачката куќа.

Мери Трамп, специјалист за клиничка психологија, наведува дека Доланд Трамп „го отфрлил и исмејувал својот татко“ и покрај тоа што тој бил неговиот омилен син, кога неговиот татко започнал да страда од Алцхајмерова болест.

Таа опиша како специјални настани и семејни шеми го создале „распаднатиот човек кој сега е во Белата куќа“ и особено чудната и опасна врска меѓу нејзиниот дедо Фред Трамп, кој почина во 1999 година, и неговите двајца синови Фред Jуниор и Доналд.

Според порталот „Дејли Бист“, кој во неделата објави дека излегува книгата, Мери Трамп исто така треба да открие дека таа е главниот извор на голема истрага за финансиите на Доналд Трамп објавена во „Њујорк Тајмс“.