Во масовна гробница во близина на болницата Ал-Шифа во Газа закопани 200 тела

Двесте тела се закопани во масовна гробница во близина на Ал-Шифа, најголемата болница во Појасот Газа, изјави денеска д-р Аднан Ел Бурш.

Тој изјави дека на медицинскиот персонал му биле потребни шест часа за да закопаат 200 луѓе.

„Почнавме околу 8:30 наутро и завршивме околу 15:00 часот по локално време“, рече Ел Бурш, пренесе Би-Би-Си.

Според него, телата седеле таму со денови додека не почнале да се распаѓаат, поради што на лекарите им преостанало само да ископаат масовна гробница.

„Не можевме да ги отвориме прозорците на зградите поради непријатната миризба што доаѓаше од дворот“, изјавил палестинскиот лекар.

Претходно од Ал-Шифа било кажано дека во масовна гробница во близина на зградата на болницата се закопани 179 лица.