Извори од СДСМ брифираат дека во тек се подготовки за процесите што ќе се случуваат во партијата, согласно статутарните постапки и она што беше јавно соопштено досега, по изборите.
Наредната недела се планирани состаноци на раководството на СДСМ и Извршниот одбор за отпочнување на постапката за свикување отчетен Конгрес, согласно Статутот на партијата.
На отчениот Конгрес ќе се рагледаат причините за изборниот резултат, спроведените анализи и поднесените извештаи за работењето на партијата.
Согласно Статутот, се очекува на отчениот Конгрес да бидат дефинирани рокови и начин на спроведување на внатрепартиски избори. Процесот на обнова ќе биде на сите нивоа, ќе се избира претседател, заменик претседател, раководство, сите органи и тела на партијата на централно и локално ниво, согласно Статутот на СДСМ.
Според официјалните податоци на Државната изборна комисија(ДИК), коалицијата на ВМРО-ДПМНЕ Твоја Македонија освои 58 пратенички места, коалицијата на СДСМ 18, ДУИ 19, коалицијата Вреди 13, а Левица и ЗНАМ по 6 мандати.
Лидерот на партијата, Димитар Ковачевски вечерта на 8-ми мај порача дека изборниот резултат е разочарувачки. Според него, на СДСМ му е зададен тежок удар не само од граѓаните, туку и од симпатизерите и од поддржувачите на партијата.
Членови на партијата повикаа на оставки веднаш – а не со одложено дејство и условени. Од партиските функции веќе најавија дека се повлекуваат Фатмир Битиќи, Перо Костадинов и Јованка Тренчевска.