Во Србија, 82 лица пријавиле несакани реакции на некоја од трите вакцини против коронавирус достапни во таа земја, објави денес Павле Зелиќ од Агенцијата за лекови и медицински средства на Србија.
„Од 82 несакани ефекти, 58 од нив беа пријавени од здравствени работници, девет од самите граѓани и 15 од фармакокомпании“, рече Зелиќ.
Според него, 40 реакции се однесувале на вакцината на „Фајзер“, 40 на кинескиот „Синофарм“, една реакција била на руската вакцина „Спутник V“ и една реакција не била дефинирана на која вакцина се однесува.
„Суштината е да се процени дали има сериозни и несакани реакции на вакцината, бидејќи самите производители испитуваат дали има какви било реакции во текот на сите три фази на клиничките испитувања“, додаде тој.
А тие реакции во Србија, како и во другите делови на светот каде што се користат овие вакцини, се, како што вели Зелиќ, воглавно очекувани.
„Тоа се болки во мускулите, во зглобовите, треска, главоболка, гадење и поминале за неколку дена. Имавме и еден случај на хематом кај постар пациент, но тоа беше брзо решено, како и две алергиски реакции кои бараа терапија, но не и хоспитализација“, потенцира Зелиќ.
Тој додава дека немало сериозни несакани ефекти.