Студентите и раководството на Факултетот за информатички науки и компјутерско инженерство (ФИНКИ) денеска го изразија незадоволството од условите за студирање со мирен протест пред Владата. На протестот се одржа и 25-та редовна седница на Наставно-научниот совет на Факултетот.
Професорите и учениците бараат подобрување на условите за студирање на студентите на Факултетот и најавуваат дека ова е само еден од серијата протести што ги планираат до постигнување на целта.
Исто така, факултетот бара од Владата да го задолжи МОН во рок од три месеци да обезбеди простор и да изврши релокација на Бирото за развој на образованието (БРО), чии вработени се сместени во три од бараките на Техничкиот кампус. Две од овие бараки, вели ФИНКИ, се во сопственост на УКИМ, а една е во сопственост на државата.
„Бирото нема правен основ за понатамошна узурпација на овие објекти и согласно тоа, Факултетот се обрати до Владата истите да бидат ослободени. Дополнително, Факултетот бара објектот кој е во сопственост на државата да му биде даден на времено или трајно користење без надомест“, се вели во барањето на ФИНКИ.
Студентите демонстративно пред Влада поставија столчиња и импровизираа предавална на отворено, покажувајќи дека немаат свој простор.
Наставата на факултетот се одржува во 8 различни објекти. Изградбата на новиот објект долго време е стопирана и не се презема ништо за нејзино повторно активирање.