Претседателот на Србија, Александар Вучиќ испрати писмо до Претседателот на Народна Република Кина Си Џинпинг во кое се вели дека Тајван е и ќе биде составен дел на Народна Република Кина за Република Србија.
„Република Србија силно го поддржува зачувувањето на територијалниот интегритет и суверенитет на Народна Република Кина, апсолутно поддржувајќи ја политиката„ една Кина“ и напорите на кинеската страна за мирно обединување на земјата“, се вели во писмото Вучиќ.
Вучиќ посочува и дека „за Република Србија, Тајван е и ќе биде составен дел на Народна Република Кина“.
„Република Србија се спротивставува на независноста на Тајван и го осудува секој обид за компромитирање на единственоста на НР Кина и резултатите од вашата политика, која се заснова на здрави принципи на мирот и стабилноста“, додаде Вучиќ.
Тој, исто така, се заблагодари за поддршката од страна на Кина за територијалниот интегритет и суверенитетот на Република Србија и за „помошта во одбраната на нашите национални интереси во меѓународните организации“.
„Понатамошно унапредување на челичното пријателство меѓу Република Србија и Народна Република Кина, како и продлабочување на сеопфатно стратешко партнерство и соработка на сите полиња, е и ќе биде еден од најважните приоритети на српското државно раководство и мојата политика како претседател. Затоа, ја очекувам вашата посета“, вели во писмото од Вучиќ, цитиран од српските медиуми.