Претседателот на Србија, Александар Вучиќ денеска изјави дека Србија не може да дозволи Косово да стане членка на Обединетите нации, како што предлагаат Германија и Франција и дека тоа ќе има последици.
Во своето обраќање до нацијата, Вучиќ како прва тема ја избра ситуацијата на Косово и најави дека ќе зборува и за енергијата, стандардите и надворешната политика и посочи дека „на маса имаме предлог од двете најголеми сили, Германија и Франција, и за тоа мора да се разговара“ затоа што би било неодговорно да се „фрли предлогот низ прозорец”.
„Не можам да зборувам за деталите на тој документ, но суштината е дека Србија му дозволува на Косово да влезе во сите меѓународни институции, вклучително и ОН, а Србија ќе го направи тоа, не е прецизирано, но ќе добие брз влез во ЕУ и веројатно значителни економски придобивки“, рече тој.
Тој посочи дека за Србија и поради Уставот, но не само поради тоа, неприфатливо е Косово да биде членка на ОН и дека тоа ќе има „последици“ бидејќи целата идеја се заснова на Србија, без формално признавање, што покажува дека се согласува со членството на Косово во ОН.
Вучиќ посочи дека идејата на Европа е што поскоро да се реши косовското прашање, меѓу другото и за „да се извади тој аргумент од рацете на рускиот претседател Владимир Путин“.
Вучиќ рече дека Албанците ги избираат сите теми на разговорите заедно со земјите од ЕУ и дека најголемата грешка на Србија е што дозволила разговорите да влезат во јурисдикција на Европската унија.
Во ноември почнува процедурата за прием на Косово во Советот на Европа
Претседателот на Србија, Александар Вучиќ изјави дека на 19 октомври комесарката за човекови права на Советот на Европа, Дуња Мијатовиќ, на таа меѓународна организација ќе и ја претстави состојбата со човековите права на Косово, а на почетокот на ноември Бирото на Комитетот на министрите ќе донесе одлука за почеток на процедурата за прием на Косово во Советот на Европа.
„Тие чекаат унгарскиот член да го напушти Бирото на Комитетот на министри, да влезе литванскиот член. Ова не е акција „ад хок“, знаеме дека е планирано многу месеци и потоа ќе почнат постапка која трае долго, но со јасен исход Косово да влезе во Советот на Европа“, рече Вучиќ денеска во обраќањето во Палатата Србија.
Според него, на овој начин се посакува да се изврши дополнителен притисок врз Србија, за да биде примено Косово пред се во Интерпол, но и специјализирани агенции на ОН, од УНЕСКО до многу други. „Зарем нема да има притисок да го прифатиме и на крајот да се соочиме со тоа и нашиот внатрешен правен систем да ги прифати фактите, односно да дозволи независност на Косово во формална смисла“, рече тој.
Тој посочи дека „може да ни земат се“, но дека Србија ќе се бори политички, правно и ќе го брани својот територијален интегритет.
„Нашите перспективи се мали, но каква и да е, во овој момент нема волја кај српското раководство, додека јас сум претседател, барем во тој дел од извршната власт нема да има волја да се прифати независноста на Косово и Членството на Косово во ОН“, посочи Вучиќ.
Тој изјави и дека 300 нови војници од САД наскоро ќе пристигнат на Косово, со цел „дополнителна заштита на територијалниот интегритет и суверенитет на Косово“.
„Ова требаше да биде јасен сигнал за нас, но и за Србите на Косово и Метохија, да не сонуваат за почитување на Повелбата на ОН, да не сонуваат и да не фантазираат за почитување на одлуките на ОН, вклучително и резолуцијата 1244, бидејќи мора да се знае чија единствена одлука мора да се почитува, а тоа е одлуката на политиката на сила“, рече Вучиќ.
Тој изјави дека Србија „ја разбрала пораката“, оценувајќи дека е прекршено меѓународното право, но дека на Србија не и преостанува ништо друго освен да се повика на тој закон и да биде „единствена што целосно го почитува“.
Додаде и дека албанските провокации се речиси секојдневни, преку појавувањето на нивните специјални полициски единици кои „немаат никаква врска со Дирекцијата на Северна и регионалната полиција“, како и дека на 6 октомври голем број британски војници биле присутни во север.
„Ќе речат дека тоа се редовни задачи. Некако редовните задачи се секогаш на северот на Косово и Метохија, тие не можат да бидат никаде на друго место“, додаде Вучиќ.
Тој изјави дека Србија во моментов има осум ноти за повлекување на признавањето на Косово и нагласи дека ќе продолжат да работат на тоа, но оти очекува „големите сили тоа да го нападнат“.