Претседателот на Србија, Александар Вучиќ, за време на денешната посета на Дежурниот оперативен центар на Воено-безбедносната агенција, изјави дека не е лесна ситуацијата за Србија и дека „треба да ја зајакнеме нашата армија“.
– Ние сме единствената земја која во суштина не е во НАТО. Формално сме опкружени со НАТО од сите страни, имаме соработка, не смееме да се правиме слепи за да видиме што се случува околу нас. Сè беше направено спротивно на меѓународните правни норми. Прекршувајќи ја резолуцијата 1244 и Повелбата на ОН, тие на секој начин ја загрозуваат регионалната стабилност и безбедност – рече Вучиќ.
Тој рече и дека „не би можеле да постоиме без силна армија“.
– Денеска сите разбираат зошто е важно да имаме силна армија, без неа не би можеле да постоиме како држава, ќе има многу повеќе инвестиции од она што е планирано во буџетот – рече тој.